Feigðarós - Hraðferð

Hér fyrir neðan er 21 mín. heimildarmynd, sem lýsir vel helstefnu neysluhyggjunnar á skýran og ýkjulausan máta.  Við erum mörg hver afar meðvitandi um rýrnun auðlinda og mengun og teljum okkur vera að vinna mikið þarfaverk með að flokka sorp og huga að endurvinnslu, sem vissulega er óumdeilanlega gott og dyggðugt.  Við friðþægjum samviskuna með þessu í leiðinni og erum ekki að gera mikið annað sem skiptir máli. Það sem skiptir máli er neysla okkar sjálfra og hve mikið og hratt við breytum neysluvörum í úrgang. 

Ferlið sem við erum í er vatnsrennibraut að feigðarósi fyrir mannkyn og siðmenningu. Við bölvum spilltum ríkisbubbum og iðnjöfrum, fordæmum barnaþrælkun, iðnaðarhyggju, auðsöfnun og náttúruspjöll; hlekkjum okkur við jarðýtur og álver, veifum mótmælaspjöldum og völdum spjöllum á iðnaðar og orkumannvirkjum í gremju okkar yfir gráðugum ofurfyrirtækjum, en erum sjálf algerlega blind á hver sökudólgurinn er. Sökudólgarnir erum við.  Meðaljón og Alþýðugunna.  Við erum neytendurnir, við viðhöldum þessu línulaga neyslukerfi frá auðlind til sorphauga.  Kerfi sem gengur þvert á lögmálin um hringrás náttúrunnar.

 Við erum jú að reyna að breyta þessu; sýnum allavega skilning og vilja, en misskiljum eða afneitum hlutdeild okkar í ferlinu. Við erum kvörnin sem breytum gæðum í rusl og iðnaðurinn hefur ekki undan í að svala neyslulostanum. Ert þú meðvitandi  um þetta?  Ert þú að gera eitthvað sem máli skiptir? Er sorpflokkun þitt valíum og kaupæðið þitt amfetamín í drunga ófullnægjunnar? Ertu fastur / föst í vítahringnum? Hefurðu komið þér upp blóraböggli í formi feitra kaupahéðna? Eru þeir ímynd hins illa?

Þú ættir að horfa á þessa einföldu mynd og sjá þinn hlut í þessu og vakna til vitundar. Skoða neyslu þína og draga úr henni.  Neysluhyggjan er meðvituð sálfræðileg skilyrðing mannsandans af hendi auðhyggjunnar og þú ert tilraunadýrið; hundur Pavlovs sem slefar ómeðvitað yfir auglýsingaskruminu.  Já og ég líka; ég veit. Sjálfsvirðing mín sem okkar allra er bundin hlutum; að eiga og vera hitt eða þetta er ég.  Ég er ekki maður með mönnum, nema ég sé svona klæddur, keyri svona, eigi svona síma, tölvu,jakka, skó,jeppa,hús,borðbúnað etc. Hafi svona klippingu, reyki þetta, drekki hitt...það er ég.  Án þessa væri ég ekkert....eða...  hef ég nokkurn tíman látið reyna á hið gagnstæða?

Er ég neysluhóra?

(Til að skoða myndina í fullri stærð; ýtið á næstysta hnappinn neðst til hægri.  Til að minnka aftur; tvismellið á myndina .Linkur á YouTube ef annað virkar ekki)